الاثنين، 15 أغسطس 2016

تنظيم نوم الاطفال الرضع


ازيكم يا مامييييييييييييز ...
النهارده موضوع بيهم كل أم :) 

تنظيم نوم الأطفال الرضع ....

اولا : لازم تعرفي ان انتي اللي بتظبطي الطفل ...انتي اللي تقدري تعوديه علي اي حاجة انتي عاوزاها 
ثانيا : مفيش حاجة اسمها انام وقت ما ينام واصحي وقت ما يصحي 
ثالثا : لازم يتعود ينام بليل عشان في هرمون مسئول عن النمو ما بيتفرزش الا بليل ...
رابعا : النوم عشان ينتظم ...لازم تكوني منظمة رضاعة 
خامسا : سيبي اي حد يقول اي حاجة واعملي اللي ف دماغك 
سادسا : زي ما الطفل بيبقي صبور جدااا عليكي وبيفضل يزن ع الحاجة اللي هو عاوزاها ...انتي كمان لازم تكوني صبورة جدااااا وتطولي بالك لحد ما توصلي للي انتي عاوزاه "اللي هو تنظيم النوم " 
سابعا : الاطفال بيجيب معاهم جدااااااااااااااااااااااااا الروتين والتعويد علي حاجات معينة...يعني بيبقي سهل عليهم كده ...حتي ولو بان ليكي العكس ....

دي قواعد حطيها ف دماغك كويس جدااااااااااا .....

تنظيم نوم الطفل حسب الدراسات ...ممكن يبقي من اول يوم...بس طبعا انتي بتبقي مرهقة ولسه خارجة من ولادة ولسه بتبدأي تجربة رضاعة...ف الموضوع مش هيبقي سهل وهيبقي مرهق جدااااا ليكي التفكير ف تنظيم نوم  ....

ف اول حاجة هقولهالك ...ابدأي تنظيم النوم من اليوم ال 45 من ولادة البيبي 
اولا هتكوني استعدتي جزء من قدرتك وهتكوني ع الاقل بدأتي ترضعي وتنظمي الرضاعة 

تاني حاجة : الطفل عشان نومه ينتظم لازم يعرف ان في فرق بين ليل ونهار 
الصبح ...فتحي الشبابيك او ع الاقل خلي نور ربنا يدخل ...لو هيبقي صعب ...شغلي نور الشقة والتليفزيون 
خلي الطفل يحس ان في حركة...وفي صخب ف البيت ....مفيش هدوء 
وبالليل العكس هدي الدنيا والنور ...واقفلي اي مصدر ازعاج او دوشة 

تالت حاجة : دي  من اهم النقاط ....
روتيييييييييييييييييين النوووووووووووووووم : 
لازم لازم لازم تعملي للطفل روتين للنوم 
اربطي دماغ الطفل بالنوم بمعني 
- اديله دش دااااااافي 
- اعملي للبيبي مساج بزيت جونسون "باللافندر" 
- خلي في حاجة طول اليوم لابساها تكون معاه او ملفوف بيها وقت النوم عشان يكون ريحتك فيها 
- اول 3 شهور...تكوني لافاه لفة التقميطة 
- ترضعية رضعة مشبعة سواء من صدرك او من البيبرونة 

الروتين ده مهم تكرريه يوميا لمدة 10 ايام ورا بعض بدون ما يكون في تفصيلة ناقصة ....

رابع حاجة : 
اذا هترضعي البيبي بليل ...ترضعيه والانوار مقفولة حتي لو صحي وكان فايق...تفضلي قافلة النور ومهدية الدنيا ومتديهوش فرصة انه يخليكي تفتحي النور وتبداي يومك بليل ....

طيب ايه فائدة الكلام ده : 
اولا انتي عرفي البيبي الفرق بين الليل والنهار .....ف هو عرف ان النهار لــ اللعب والليل لــــ النوم .
ثانيا : عملتيله روتين للنوم ف ربطتي ف دماغه بين فكرة الروتين وفكرة الروتين 
ثالثا : عودتيه علي ان مهما حصل مش هنفوق ونصحي الدنيا بليل 


حاجات مهمة تاخدي بالك منها  : 
- أثر الموضوع ده مش هيبان اووووووي غير بعد شهر 
- لازم تكوني صبورة 
- لازم تعرفي ان البيبي هيصحي بليل اكيد عشان يرضع 
- لازم تعرفي ان بعد فترة هترتاحي لما تعملي النظام ده 
- لازم تعرفي ان كل ده هيساعدك تلاقي شوية وقت لنفسك وبعد فترة هتلاقي نفسك بتنامي بشكل طبيعي زي الناس ...بليل 


طيب ايه هي ساعات النوم الطبيعية للاطفال ...هتلاقيها ف الصورة دي : 



عادات النوم : 
الطفل ف الاول هتلاقيه مش عارف ينام لوحده لانه عاوز حاجة تساعده ع النوم : 
في خمس حاجات بتساعد الطفل ع النوم : 
- اللفة اللي اسمها كوفلية او تقميطة .
- الضوضاء البيضاء 
- الهز 
- اللهاية او السكاتة او التيتينة 

طيب لما الطفل بيتعود علي حاجة معينة للنوم...مش هيعرف ينام بعد كده غير بيها 
لذلك يفضل انه مايتعودش علي حاجة واحدة 
طيب اذا حبيتي تريحي نفسك ف الاول وتخليه ينام بسهولة 

- ممكن تلفيه اللفة اللي ف الصورة دي ...بتساعد ع النوم وبتريحه : 


- ممكن تجيبي سرير من اللي بيتهز اوتوماتيكي ....وبعد ما ينام بتفصلي الهز ...مشكلة الطريقة دي انه بيتعود جدا ع الهز ولو انتي ف مكان عام او ف اي مكان والبيبي عاوز ينام لازم تفضلي تهزي فيه 

- ممكن تنزلي تطبيق اسمه White Noise Free 
ده تطبيق متسجل عليه جميع الاصوات اللي بتشبه الاصوات اللي كان الطفل بيسمعها وهو ف بطنك 
صوت اجهزة الجسم بيشبه الاصوات دي زي صوت الغسالة ...المكنسة...السيشوار...الخلاط 
في صوت من الاصوات الطفل هيكون مستأنسه وهينام عليه ...جربي كذا حاجة 
ميزة الطريقة دي...انه بينزل ع الموبايل من Play Store 
وبتقدري تشغليه في اي وقت البيبي عاوز ينام فيه وبينام عليه ...


- التيتينة....مريحة جدااااااااا...بس لازم تجيبي اللي بتتشبك بكلبس ف الهيدوم عشان ماتقعش
عيبها ان كل ما تقع البيبي هيعيط عشان تحطيهاله تاني 
وانا شايفاها مش حلوة ....


طيب الحاجات دي استخدامها بيكون اول 3 شهور....اما بعد كده يفضل تمنعيها بالتدريج عشان الطفل يتعود ينام لوحده 
من 3 ل 6 شهور....لازم لازم لازم تحاولي بكل قوتك تخلي الطفل يتعود ينام بدون عوامل مساعدة عشان ده صحيا كويس له ومريح ليكي ف نفس الوقت ....


دي مجموعة فيديوهات بتتكلم عن تنظيم نوم الاطفل ....
ذاكريهم كلهم بالمعني الحرفي للكلمة .....
https://www.youtube.com/watch?v=n59y9NvRDxg&list=PLR2VeXQ2tf0dtizNE_ba9SqvguhsjxI6L
بعد الشهر التالت البيبي بيبقي كبر شوية ف بيبقي قادر يكون له نشاطات ...بمعني انك ممكن تقدري تشغليه بحاجة ...تلعبي معاه 
ف بتقدري تخليه فايق ويصحي لفترة اطول وبكده لما بتيجي تنيميه ...بيدروخ وبيكون عاوز ينام جداااااااااااا ف ما بياخدش وقت ف النوم وبينام ....

ده لينك بيتكلم عن كل حاجة تخص النوم للاطفال :
http://www.pampersarabia.com/ar-sa/newborn-baby/sleep

الحاجات دي هتفرق مع كل ام ...صدقيني حاولي تجربي ومش هتندمي واصبري لان النتايج حلوة ....

ملحوظة : افصلي الطفل من اول يوم في سرير منفصل لانه لو اتعود علي النوم معاكي ف نفس السرير هتتعبي عشان تفصليه وهيبقي لازم كل مرة يجيي ينام تكوني معاه ...وغير كده بعد فترة هتخافي عليه لانه هيبدا يتحرك ...ف الافضل يتم فصله 
وفي حاليا سراير للاطفال طالعة بينفع تتفتح من الجنب عشان يسهل علي الام الرضاعة ويكون الطفل جمبها بس ف سرير منفصل :) 


دمتم سالمين :) 



السبت، 6 أغسطس 2016

فوائد السفر بالنسبالي :)



برغم كل المتاعب والصعوبات اللي واجهتها ف السفر ....بس مقدرش أنكر ابداً أن له فوايد كتير....

فوايده مش ف اني اتعرفت عن ناس مختلفة بجنسيات مختلفة وعرفت ثقافات اخري ...
لاء الموضوع أعمق من كده بكتيييييييييييييييييييييير ....

1-  السفر بيقوي اللغة عندك ...لان في دول هيبقي فيها مقدار أجانب بشكل كويس ف بالتالي لازم تتكلم انجلش معاهم وانا بشوف ان افضل وسيلة لتعلم اللغة هو الممارسة ...

2- السفر بيقوي الرابطة بينك وبين أسرتك سواء اللي معاك أو اللي ف مصر ....بمعني بيقوي الرابط بينك وبين جوزك او مراتك لانكم مالكوش غير بعض ف الغربة ف بتستقووا ببعض علي اي حاجة تانية وبتقووا بعض كمان ...
الرابطة بينكم وبين اهاليكم بتزيد لانهم دايما مشتاقين لكم...دايما مفتقدين وجودكم وانتم كمان كذلك ...ده غير اني لما اتجوزت سافرت علي طول...وبدأت ادخل ف مسئولية بيت وأسرة...وعرفت اد ايه اهلي كانوا بيتعبوا واحنا مكناش حاسين بمدي تعبهم ولا معاناتهم ...

3- السفر غير فكرتي عن حاجات كتير...خلاني اطنش واشيل من دماغي حاجات كتير...مبقاش عندي شغف فظيع للحاجات اللي كنت بحبها الاول ....بقيت افضل حاجات تانية...السفر فتح عينيا علي الدنيا بمعني اصح...خلاني اعرف فعلا ان في بلاد كتير كويسة ومحترمة...خلاني اعرف ان مش لازم عشان اتربينا علي كده يبقي ده اخر الدنيا ...لاء في حاجات تانية ف الكون تستحق اننا نجربها ونعيشها .....

4- السفر بيقوي الضهر...خلاني اعرف اشيل نفسي بنفسي ومعتمدش علي حد...علي اد ما هي حاجة ف بعض الاحيان مش حلوة بس هي مفيدة....خلاني اشيل مسئولية بيت من غير ما احط ف دماغي ان بابا او ماما هنا ف هيشيلوا عني...
بمعني اصح بقيت بعتمد علي نفسي ف كل حاجة...

5- مهم لاي زوجين ف اول سنة من حياتهم يبقوا بعيد عن الاهل من الطرفين "خصوصا اول سنة عشان بتبقي السنة اللي بيتعرفوا فيها علي الحاجات اللي مش بتظهر ف الخطوبة وبتظهر بعد ما يتقفل عليهم باب "  ...مهم يبقوا بعيد...عشان مايلاقوش غير بعض يحلوا مشاكلهم سوا....ينجحوا العلاقة ببعض...ومايكنش في غيرهم 
وانا بالنسبالهم ده اقوي اختبار للعلاقة .....

6- السفر خلاني ست بيت من الدرجة الاولي ومن غير غرور " خلاني ادخل ف تحدي" ان مفيش ماما هتشيل عني ولا هتساعدني ولا هتيجي تعملي اي حاجة ف يوم من الايام وبالتالي لازم اعتمد علي نفسي وابقي احسن ست ف نظر جوزي ف كل شئ وبناءا علي كده ...بقيت اعرف من ماما اصناف الاكل اللي مش بعرف اعملها بتتعمل ازاي واكتبها وانفذ ...وكانت بتطلع حلوة 

واكتشفت حاجة مهمة...ان لما بتبقي تطبخي لحد انتي بتحبيه + انك طول الوقت الطبخ بتذكري ربنا ...الاكل بيطلع اكتر من رائع 

الحمدلله وصلت لمرحلة حاليا "اني عندي فان بيدج ع الفيس بنقل فيها كل خبرتي ف الطبخ وكل خبرتي ف شغل البيت تقريبا " ....
وده اللينك بتاعها
www.facebook.com/omnyafood

7- السفر خلاني ارجع عادات زمان في بيتي ...زي مثلا اني احسس نفسي وبيتي فرحة العيد ف بقيت اخبز الكحك والبيتي فور والبسكويت والغريبة ف البيت وبوزع علي حبايبنا هنا كمان بفضل الله وبحاول اطور من ادائي كل مرة ...وبفضل قبل كل مرة اعمل بحث مكثف عن كل شئ هعمله ...يعني اول مرة البيتي فور نشف مني ...فضلت ابحث وابحث لحد ما اكتشف اني زودت البيض وهو اللي سبب ان البيتي فور ينشف :) 

8- خلاني اعرف اني لما هقف جمب حد هنا ف الغربة بالذات ربنا هيردلي وقفتي دي اضعاف واضعاف . 

9- السفر خلاني اعرف اني طالما مش بشتغل دلوقتي...يبقي لازم افضل اشتغل علي نفسي عشان افضل ف تطور مستمر ولذلك طول الوقت باخد دورات تدريبية اون لاين ف تخصصي وف اي شئ ممكن يفيدني :) 
وكان اخر حاجة اخدتها "دورة ادارة الموارد البشرية" ودورة في "الطبخ" ودورة ف التغذية " ودورة " Career Advancement" 
وبصراحة رغم اني مش بشتغل ...الحاجات دي بتفيدني ...لاني مش بكتفي باني باخدها وبس...لاء بيبقي معايا  Note Book بدون فيها الحاجات المهمة عشان استفيد وف اي وقت اقدر ارجع اراجع اللي اخدته ده ... :) 

10- السفر خلاني اهتم بكل مناسبة حتي لو صغيرة ...سواء تخصني او تخص أحمد او تخصنا احنا الاتنين..او تخص القريبين لمجرد اننا نفرح نفسنا واتعودت علي كده ف بقيت تلقائية مستنية المناسبات دي وبحضرلها من بدري  ....

11- السفر خلاني اركز شوية ف أمور معينة  ف الدين ...زي القصر ف الصلاة والجمع ...خلاني ابحث ف الموضوع ده عشان مفيش صلوات تضيع مني اثناء السفر...خلاني احفظ دعاء السفر...خلاني اركز كويس ف دعواتي وانا مسافرة لانها مستجابة ..

12- بقيت احاول اركز ع الايجابيات اللي ف الحياة بدل تركيزي اني مش مع اهلي وان في حاجة ناقصة 
خلاني مبقتش اقول لما انزل مصر علي كل حاجة...خلاني اركز اني اعيش دلوقتي اللحظة واسيب النزول لوقته ...خلاني ابدأ اعيش حياتي ف وقتها ومش كل حاجة تتأجل لحين اشعار اخر للحظة ....

13- حقيقة مهمة : السفر علمني مين الناس الحقيقية اللي ف حياتي اللي مهما بعدت ومهما خدتني الايام ومهما حصل...ف هما موجودين ومش هيتغيروا لانهم بيحبوني بجد...لانهم مهتمين يشوفوني مبسوطة ...لانهم بيعذروا ...لانهم عاملين حساب ان اللي بيسافر ده محروم من مشاعر كتير ...ف بيهونوا عليه بوجودهم بلطف ف حياتي ....وعلمني كمان أن في ناس بس مستنية غلطة...مستنية اي حاجة عشان تتقلب وتتعوج وتبقي انت الغلطان ...

14- علمني ان الدنيا مش مستاهلة  اي حاجة....

15- السفر علمني ان حاجات كتييييييييييييييييييييييييييييييير اوي بتروح وتيجي ...ماعدا اتنين الدين والصحة,...لو راحوا ...يبقي سلام علي الدنيا 

16- اتعلمت اني في حاجات مهما حصل لازم احافظ عليها عشان هي اللي باقية زي "اهلي - جوزي - الناس اللي بتخاف عليا وبتحبني بجد - الكتب " 

17- اتعلمت ان مفيش حاجة  بتحصل بلا سبب ...كل حاجة ليها سبب ..عشان كده وجودي ف المكان ده دلوقتي وتوقيت مقابلتي لكل حد بشوفه وبقعد معاه ليها سبب وحكمة هعرفه دلوقتي او بعدين ....

18- اللي مش عارفة  اتعلمه اني متوجعش ...اني مبطلش حزن وخنقة علي ان في لحظات جت وبتيجي واهلي مش معايا فيها 
كان نفسي يوم ما عرفت اني حامل...اروح لاهلي واقولهم انا حامل ويحضنوني ويباركولي وجها لوجه ...اللحظة دي مش هعرف اجيبها تاني 
- يوم فرح اخويا لما بفتكره او بتقع قصادي صورة ...مش بقدر معيطش ...كل الناس كانت موجودة ف اليوم ده واتصورت معاه وباركتله وانا لاء...مع اني انا الاهم ...انا اخته ...انا اللي عشت معاه ف بيت واحد لسنين كتييييييييييير...يمكن اكون انانية ف تشبيهي ده ...بس عدي 7 شهور علي فرحه تقريبا بس لسه مخنوقة ولما بفتكر بعيط وبنهار اقسم بالله ....وف نفس الوقت بدعيله ربنا يرزقه الفرحة طول عمره ويقر عينيهم ببعض ...
- العيد ف الغربة مالوش طعم ...بس بحاول احسس نفسي بفرحته....
- لسه مش عارفة مضايقش لما الاقي الكل ف مصر مجتمع وانا اللي مش موجودة...بفرح لتجمعهم وبزعل لعدم وجودي ...ربنا يجمعهم ف الفرح والخير دايما يارب ومايحرمناش من بعض ابدا كلنا 

19- رتم الحياة ف الغربة مختلف شوية غير مصر....ف ده بيخلي الواحد ممكن يكون عنده شوية وقت...اتعلمت بقي ان ف شوية الوقت الصغيرين دول اعمل حاجات لنفسي وفقط ...زي اني استغل ربع ساعة اخطفها اعمل ماسك علي وشي ...اتعلمت ازاي الواحد يقدر يعمل باديكير لرجله وايده وبقيت اعمله دائماااااااااااااا ....اتعلمت اني ادور علي طول علي طرق جديدة ومختلفة لترتيب الحاجات سواء الهيدوم ...سواء حاجات المطبخ ...او اي شئ ممكن يترتب بشكل منمق ...اخطف ساعة ف اليوم اقرأ فيها ...اهتم بنفسي اكتر منها بحافظ علي انوثتي ومنها بحافظ علي نفسيتي متظبطة ومشرقة ومنها كمان بعود بنتي ان الاهتمام بالنفس ده من روتين الحياة وشئ اساسي ....

20- السفر خلاني اكتب البوست ده دلوقتي :D اللي يمكن يفيد أي حد يعدي من هنا بشكل ما ....

ربنا يردنا لأهلنا سالمين غانمين ويصلح حال بلدنا 
وحسبي الله ونعم الوكيل ف كل حد كان سبب في خروج شباب البلد دي برة
:) 





الأربعاء، 1 يونيو 2016

التوقعات


التوقعات...

   الكلمة اللي بتخلينا دايما ننزل من سابع سما لسابع أرض 
اللي بنبني علي أساسها حاجات كتيييييييييييييييييييييير 
وف الآخر تتهد فوق دماغنا 

يمكن بيبقي لسه مجاش 
يمكن التأخير ده خير 
يمكن كل ده لحكمة من ربنا 

بس انا بتعب من العشم 
بتعب من العشم بأي حاجة وف أي حاجة 
مبحبش الإحساس ده 

اني اتعلق بحاجة واكون برتب كل دنيتي علي انها هتبقي موجودة
وفجأة كل ده يتشطب عشان الحاجة محصلتش او ناس تانيين ف ايديهم الحاجة دي 
ف قرروا يتأخروا أو مش دلوقتي او اي حاجة 

المهم انها ما بتحصلش 
ممكن تحصل بعدين 
بس لما بنتعشم بحاجة ومابتحصلش 
بنفقد الإحساس بيها 


كان في جُملة للكاتبة أحلام مستغانمي بتقول  : 

"ثمة نوعان من الشقاء، الأوّل ألاّ تحصل على ما تتمنّاه ، والثاني أن يأتيك وقد تأخّر الوقت وتغيّرت أنت، وتغيّرت الأمنيات، بعد أن تكون قد شقيت بسببها بضع سنوات"

هي دي المشكلة....بنتعب ونشقي
ولما الحاجة اللي اتبهدلنا عشانها تيجي
بنبقي فقدنا الاحساس بيها
وفقدنا كل شغفنا للأسف :( 

انا الحمدلله راضية وبقول الحمدلله
بس حاجة جوايا بتخليني ابقي متمردة بشكل ما علي حاجات معينة 

نفسي يارب ابطل اتوقع واتعلق بالتوقعات لانه احساس سخيف :( 

يارب 

الاثنين، 30 مايو 2016

الذكريات




فكرة الذكريات اللي محاوطاني ...واللي بتخليني مش عارفة افرط في حاجات كتير بسهولة 
بتمسك بأي حاجة ليها علاقة بالذكريات ..حتي لو في أمس الحاجة اني اسيبها 

مش قادرة اعرف ده وفاء ولا ضعف ولا الاتنين ولا ان في حاجة تاني متملكة مني ومش راضية تسيبني 

انا فعلا عندي مشكلة مع الذكريات ...
بتشد لأي حاجة ليها علاقة بيها...

مش حابة وجودي هنا...بس برغم كده مش عارفة ازاي ف يوم 
هنزل اعيش ف مصر ...واسيب كل الذكريات دي هنا 

كل مرة بنزل فيها مصر ...بعيط 
ولما باجي راجعة ...بعيط بردو 

كل مرة الوجع بيبقي اقوي...كل مرة بعيط اكتر 

متعودتش زي ماناس كتير قالتلي هتتعودي
والحمدلله اني متعودتش وان شاء الله ماتحصلش ابدا 
لاني بحس ان الناس دي عندهم بلادة ف المشاعر وعدم احساس بشكل ما 


الذكريات عندي بتضم حاجات كتير ...هيدوم ..حيطان..شنط..اقلام..مشاريب..اكلات 
اي حاجة اتشاركت فيها مع حد 
حتي لو كانت جملة او كلمة 

الذكريات ...ساعات بتكون خاتم سليمان اللي بيقدر يفرحني 
وساعات بتكون القيد اللي بيخنقني ومش عارفة اخرج منه 

مش عارفة اوصف الحالة بالظبط 
بس كل اللي قادرة اقوله ...ان رمضان ملوش طعم هنا :( 

ربنا يخليلي زوجي وبنتي ...

بس اهلي وقعدتي معاهم ع السفرة
الضحك وقت السحور 
لمة العائلة 
صلاة العيد 
وقت الفجر ف رمضان 
شرب المية الكتير 
قراءة القرآن 

حاجات كتير 
مش عارفة اعوضها ومش عارفة انساها ومش قادرة محسش بضيق ...
ربنا يهون علي كل مغترب 
وربنا يهون عليا وعلي كل حد الذكريات محاوطاه وحاصراه ف مكان مش قادر يخرج منه ...

:) 


تقلب المزاج


مشكلتي كلها في كلمة "موود"

مشكلتي اني ممكن ابقي كويسة جداااااااااا ومفرفشة 
وتيجي حاجة بسيطة تقلب المود كله وتخليني في حالة كآبة وحزن وقرف وعصبية :( 

حاولت اسيطر ع الحالة دي بس للأسف مش عارفة 
يمكن عشان انا بطبعي حساسة جدا 

يمكن مثلا عشان انا بطبعي بحب كل حاجة تتعمل مظبوط وزي الكتاب ما قال 
ولما الحاجة مابتتعملش كده او لما الدنيا مابتبقاش مظبوطة ...بتضايق !!

يمكن كل ده ...
لحد دلوقتي مش لاقية سبب مقنع 
ولحد دلوقتي مش عارفة اسيطر 

الحاجة الوحيدة اللي بلاقيها ميزة ...
اني لما بتعصب ولما بضايق او ببقي حزينة 
او في اي حاجة مغيرة المود 
بفضل قاعدة ساكتة
مش بتكلم نهائي غير لما بخرج من الحالة دي 

هو مشكلة الموضوع ده انه بيضايق اللي حواليا وبيحبوني 
بيبقوا مضايقين اني ساكتة كده وبيبقوا عاوزين اني اتكلم عشان ارتاح 

بس الفكرة فعلا ان ف الوقت ده راحتي بتبقي ف السكوت 
لاني مش هحتاج أذن عشان اتكلم...اكيد لما احتاج هتكلم 


مش عارفة لحد دلوقتي الي اي مدي الحوار ده ف صالحي او لاء 

بس والله بيبقي نفسي كل حاجة تبقي مظبوطة والي حد ما كاملة ....

يارب هون .... 


السبت، 28 مايو 2016

معانا بيبي "الشهر الاول"- الرضاعة


البيبي اتولد...ألف مبروك...ربنا يحفظه ويتمم لك بخير وييسرلك ويهون عليكي 


اولا : اووووووووووووعي تتخلي عن الرضاعة الطبيعية
هتتعبي شوية بس هترتاحي بعدين ...


بداية كده : البيبي مش هيرضي يرضع بسهولة 
لان الحلمة مش بتبقي بارزة اوي ف بيبقي صعب عليه يرضع 
وبياخد وقت علي اما بيتمكن من صدرك 

2- لازم تتعبي عشان لبنك اهم للبيبي من اي حاجة تانية 

3- شوية خطوات هتعمليها هتسهل الدنيا ان شاء الله : 

اولا  : هتجيبي حاجة اسمها Nipple Shield من الصيدلية 
دي عبارة عن حلمة سيليكون بتتحط علي الصدر بيبقي في فتحات بتسمح 
بمرور اللبن وف نفس الوقت سهل ع البيبي انه يمصها وبتسهل عملية تكوين حلمة لصدر الام
شكلها كده زي الصورة : 



ثانيا : لما تبدأي ترضعي "مش قبل" بتجيبي دوا اسمه "هيربانا" ده عبارة عن اعشاب في هيئة اقراص 
اعشاب مُدرة لــ اللبن ...مفيش منها ضرر ....
ليه بقول لما تبدأي ترضعي عشان ببساطة لو اخدتيها ...هيحصل ادرار للبن والبيبي مش بيرضع 
ف كده مفيش استفادة...الا في حالة انك بتشفطيله لبن وبياخده بالبيبرونة 

ثالثا : اذا حاولتي مع البيبي كتير ومش بيرضع منك 
ماتستسهليش وتقولي هديله صناعي ....لااااااااااااااااااااااااااااااااااا
جيبي شفاط لبن "بالكهرباء" ماتجيبيش اليدوي 
بكرر تاني "بالكهرباء" 
واشفطي اللبن واديهوله بالبيبرونة ...المهم ياخده
في شفاط لبن ...بتشفطي من صدر وبعدين تنقلي علي الصدر التاني
وفي شفاط نازل انك تشفطي من الصدرين مرة واحدة وف نفس الوقت
شوفي الانسب ايه وجيبيه 


رابعا : بدأتي ترضعي او بدأتي تشفطي ...يعني ف كل الحالات بياخد لبنك ...
قبل كل مرة رضاعة ...تشربي كوباية مية مع كوباية لبن 
او كوباية مية مع كوباية حلبة 
او كوباية مية مع كوباية ينسون 


المية اساسية ....مش اقل من 10 كوبايات ف اليوم 
الحلبة كوبايتين 
الينسوم كوبايتين 
ومش اقل من 3 كوبايات لبن 
كلي جرجير كتيييييييييييير 
كلي لحوم حمرا 
كلي سمك 
معلقة حلاوة كبيرة الصبح  ومعلقة حلوة كبيرة بليل  كفيلة تدر لبن 
اشربي عصاير "معمولة ف البيت" ولو مش عايزة تتخني ...تبقي من غير سكر 

قسمي يومك كده ...قبل كل مرة رضاعة مثلا ...كوباية مية مع كوباية اي حاجة تانية 
وبعد الرضاعة اشربي مية 

لو كده هضمنلك انك تاخدي 2 حلبة و2 ينسون و3 لبن و2 عصير ومش اقل من 10 مية 
وان شاء الله اللبن اداراه هيبقي زي الفل  ومش هتتخني ان شاء الله لان الرضاعة بتحرق 


الرضاعة بتحرق ....متخافيش من التخن طول مانتي بتاكلي اكل مظبوط 
كلي فاكهة...وخضار....
قللي من الحاجات الحلوة 

والله الرضاعة بتحرق :) :D 

خامسا : في طرق كتير للرضاعة...بس الطريقة اللي جابت نتيجة مع كذا واحدة ف الاول وخلت البيبي يرضي يرضع هي : 
ان الام تكون نايمة علي جمبها وليكن اليمين وحد منيملها البيبي علي جنبه الشمال وسانده...وتخليه يرضع منها كده 
الطريقة دي فقط مسموح بيها ف اول كام يوم عشان يرضي يرضع انما بمجرد ما يعرف يرضع 
ترضعيه مظبوط ...عشان اللبن ممكن يتسرب لأذن البيبي ويعمله لا قدر الله التهاب ف الاذن الوسطي ....


حاجة  مهمة جدا جدا : دوا هيربانا بتاخديه ف الاول ...لمدة تلاتة ايام ...تلات مرات ف اليوم 
بعدين لمدة تلات ايام ...مرتين ف اليوم 
بعدين مرة واحدة ف اليوم ...ممكن لمدة شهر او اكتر زي مانتي شايفة انك محتاجة ادرار لبن 

بلاش ترضعي ابنك وانتي مضايقة ...خصائص اللبن بتتغير وهو بيجيله مغص 


في اول مرة رضاعة : بلاش تصرخي ف وش البيبي واستحملي
بعد كل مرة رضاعة ادهني الصدر زيت زيتون عشان الترطيب...لو مفيش زيت زيتون...ادهنيه بانثينول 
صدقيني صدقيني صدقيني ...هتفرق جاااااااااااااااااااااااااااااااامد معاكي 

الرضاعة مهمة جدا 
لو جالك برد ...رضعي البيبي لان الاجسام المضادة اللي بيفرزها جسمك عشان يقاوم المرض بتروح للبيبي ف اللبن وبكده بيكتسب مناعة هايلة 

الرضاعة مهمة جدا 
اوعي تستسلمي 

رضعي رضعي رضعي 

اكتر وقت اللبن بيبقي في أغني حالاته وبيبقي هايل جدااااااااا 
الوقت اللي من بعد الفجر 
حتي لو بترضعي طبيعي وصناعي 
الوقت ده بالذات ممكن ياخد رضعة من صدرك وينام ...لان اللبن بيبقي دسم وغني جدا ماشاء الله لاقوة الا بالله 


مدة الرضعة : اول اسبوع ...لاول اسبوعين ...البيبي بيرضع 10 دقايق من كل صدر وبتبقي مشبعة عن شرط انه يكون بيرضع فعلا مش حاطط الصدر ف بقه وخلاص ويكون نايم 

بعد كده تلت ساعة من كل صدر بتبقي رضعة مشبعة 

مبدئيا كده : اذا البيبي رضع 10 دقايق بيشبع...بس ليه بنقول تلت ساعة...عشان ف العشر دقايق التانيين اللبن الاغني والادسم بينزل للطفل وده اللي بيبقي فيه المواد الدهنية المهمة لنمو وبناء الطفل ...وده اللي بنحرص علي اننا نديه للطفل 
ف ياريت طالما مفيش وراكي حاجة...تدي البيبي 20 دقيقة من كل صدر 

وتتاكدي ان البيبي بيرضع 
وياريت مايكنش لابس حاجات كتير وهو بيرضع عشان يكون متنبه وفايق للرضاعة بدل ما تكوني بتساعديه ع النوم 
ولو نام علي صدرك صحصحيه ...العبي ف رجله...او رقبته بس براحة عشان يصحي ويكمل رضاعة 

ربنا يهون عليكم الفترة دي ....
الرضاعة مستاهلة تتعبي عشانها 
وكمية الحنان والمشاعر الجميلة اللي بتحسي بيها لما بترضعي البيبي صدقيني لا تضاهي اي شئ تاني 
استمروا يا بنات 
شابوه لكل واحدة عافرت عشان ترضع ابنها طبيعي 

ربنا يخليلكم بيبهاتكم ويحفظهم وين ما كانوا :) 
ويرزقكم باللبن والتغذية السليمة لاطفالكم ;) 







بداية وجود بيبي "رحلة الحمل" ج3


جينا للجزء الثالث والأخير في رحلة الحمل 

الشهر السابع 
الشهر الثامن 
الشهر التاسع 

خلينا متفقين ...ان تقريبا كده اجمل فترات الحمل من نص الشهر الرابع ل نص السابع 
بعد كده التعب بيختلف من واحدة لواحدة بس بيبقي تعب محتمل وقادرة تتحمليه 

محتاجة ف الفترة دي تشربي مية كتير 
تستمري انك تاكلي اكلات بسيط علي وجبات كتير 
بداية من النص الثاني للثامن اتمشي كتييييييييييييييييير 
يُفضل نص ساعة ف اليوم وهتبقي كفاية 
لحد ما تدخلي ف التاسع زوديها شوية 
يعني اتمشي النهارده نص ساعة و5 دقايق 
بكرة نص ساعة و10 دقايق
وهكذا 

المشي بيسهل الولادة جداااااااااااااااااااااا
اوووووووووووووووعي تقعدي وتكسلي وتقولي مش هعمل حاجة ف البيت 
المرحلة دي هي مرحلة شغل البيت 
اشتغلي ف البيت ...امسحي الارض 
اكنسي ...اطبخي 


الخطوة السحرية بقي : 
فيكي شوية صحة...يبقي استغليها 
اعملي اكلات وشيليها ف الفريزر 
صدقيني هتنفعك سواء ولدتي لوحدك او كان معاكي حد 

اعملي كفتة رز وشيليها ف الفريزر 
مكرونة بشاميل 
كذا فرخة مسلوقة ...وشيليها هي وشوربتها ف الفريزر 
عصجي لحمة وشيليها ف الفريزر 


هاتي كذا  كيس لشعرية كامل وحمريه ....وشيليها ف التلاجة متحمر هينفعك 
هاتي كذا كيس لسان عصفور لو انتي من محبيه اوي واعملي فيهم زي ما عملتي ف الشعرية 
وشيليهم ف برطمانات محكمة الغلق وع التلاجة عدللللللللللللل 

هاتي حلبة اغسليها ونشفيها وشيليها بحيث تكون جاهزة ع السواء علي طول 

اشوي فرختين مش اكتر من كده وحطيهم ف الفريزر 
ممكن كباب حلة وتشيليه ف الفريزر 

كل الاكلات دي هتسعفك 
اولا لو هتولدي لوحدك 
ثانيا لو معاكي حد ...هتسعفكم انتوا الاتنين 
ثالثا : لو حد طبخلك ف الاول يبقي مصلحة ...انك تشيلي الاكلات دي لحد ما تبقي لوحدك هتسعفك ف اول كام يوم ليكي لوحدك 

اسمعوا كلامي هتكسبوا 


ف الفترة الاخيرة من الحمل...مهم اننا نحس بالانتعاش 
جيبي شاور جل بريحة حلوة  وقوية 
جيبي صابون مغربي من اللي بيبقي ف علب زي بتاعة الكريمات 
خدي دش وبالشاور جل 
بعدين بالصابون المغربي 

حاولي تحسي بالانتعاش  وتستمتعي 

اكوي شعرك ....او غيري تسريحته ...حطي مكياج ف البيت 

نفسيتك مهمة صدقيني ....

كلي تمر كتير واقري آية الكرسي
ولو بتحبي القرفة اشربيها ...

كل ده بيسهل الولادة 

في اواخر الشهر...ممكن ايدك ورجلك تورم ..ده طبيعي بس لو حسيتيهم وارمين جامد لازم تروحي تطمني
اوعي تاكلي مخللات ...الضغط العالي مصيبة ف اواخر الحمل بالذات
اي حاجة تظهر جديدة لازم تروحي تطمني
استعدي للي جاي يا بطلة...هيبقي معاكي اللي يملي عليكي كل دنيتك ;) 

يوم الولادة ....هيبقي ذكريات وهتفتكريه بعد كده وتقولي ياااااااااااااااااااااااه 
كل حاجة عدت ....

استمتعتي وادلعي بالايام دي 

يوم الولادة...اقري آية الكرسي كتير وادعي ربنا ليكي ولاسرتك ولكل حبايبك 
دعوتك مستجابة 


نصيحة مهمة جدا : اثناء الولادة اوعي تتخلي عن انك تلبسي شراب
الرجل بتكون ساقعة جدااااااااااااا ومحتاجة تتدفي عشان مايجيلكيش كرمبات
لازم تلبسي شراب واوعي تجازفي وتقولي مش هلبس شراب
اسمعي كلامي لاني عملت بالنصيحة دي وكانت هايلة جداااااااااا
ربنا يجازيها خير اللي نصحتني بيها 
ربنا يقومكم بالسلامة ...وييسر اموركم 

الجزء الجديد ...التعامل مع الطفل من سن 0 الي 6 شهور :) :) :) 



الخميس، 3 مارس 2016

بداية وجود بيبي "رحلة الحمل" ج2



مبروووووووك...خلصتي الفترة الأولي 
غالبا معظم البنات بينتهي عندهم القئ والوحم بعد أول تلات أشهر 

يعني بعد ال 3 شهور هقدر اقولك هتبدأي ترجعي لنشاطك وتفوقي 
النوم اللي كان مسيطر عليكي هيقل 
القئ هيقل ....

وهتبدأي في أحلي فترة في الحمل 
تقريبا الحمل هيكون ثبت ...بس بردو لازم تخلي بالك 

بداية من الشهر الرابع بتبدأي تاخدي حديد وكالسيوم 
ولازم تخلي بالك وماتنسيش تاخديهم عشان مهمين ليكي وللبيبي 

ف الفترة دي استمتعي جداااااااااااااا 
في بنات بتحس بحركة البيبي عند الشهر الرابع 
وفي بنات بتحس ف الخامس او آخر الخامس 

اطمني ...بس لو لحد اول السادس محستيش لازم تسألي الدكتور 

ابعدي عن المخللات والحوادق...مهم جدااااااااااااااااااااااااااااااا انك تلتزمي بالنصيحة دي 
اشربي مية كتييييييييييييييييييييييييييييييييييييييييييييييييير 
ماتشيليش حاجات تقيلة وتقولي ماهو الحمل ثبت 
بلاش تنطيط كتير

حاولي تكون حركاتك متوازنة 
لو عاوزة تسافري ...الفترة دي مناسبة جداااااااااااااااااااااااا للسفر خصوصا السفر بالطيارة 
بس يفضل لو في سفر اكتر من تلات ساعات ياريت تستشيري الدكتور 
ومهم جداااااااااااااااااااا تروحي تطمني علي نفسك قبل السفر وتسألي الدكتور وبعد السفر بردو 

الفترة دي من احلي فترات الحمل ....
استمتعي واستعدي للي جاي :) 


ممكن ف الفترة دي تبداي تحسي بحموضة وخصوصا من آخر الخامس 
في دوا ممكن يساعدك ...الدكتورة بتكتبلك عليه اكيد ...

مازلت بكرر ...الاكل يكون بكميات معقولة وعلي فترات عشان تمنعي الحموضة او تقلليها علي اد ما تقدري
وعشان كمان تقدري تاكلي وماتحسيش انك اتمليتي وتقعدي بعدها فترة طويلة وماتاكليش 

خلي بالك...سواء اكلتي او لاء...البيبي غذاه واصله ...ف الاكل مهم ليكي جداااااا قبل ما يكون مهم له 
وصدقيني لو اتولد ناقص ف الحجم او ضيعف من نحية العظام او الكالسيوم ...هتندمي وتقعدي تلومي ف نفسك جداااااااااااا

:) 

ربنا يكملك علي خير ويهون عليكي 
انتظريني ف الجزء القادم :) 

والاخيييييييييييييييييييييييييييييييييييير ;) 


الثلاثاء، 8 سبتمبر 2015

بداية وجود بيبي "رحلة الحمل" ج 1






هتكلم عن رحلة الحمل العجيبة والغريبة .....

طبيعي أي بنت بيبقي عندها حلم الأمومة من وهي لسه صغيرة.....
مهم أوي انك لما تتجوزي وتكوني بتطمحي للحمل...تداومي علي الفوليد اسيد لأنه بيساعد علي الحمل...وطبعا كله بأمر ربنا 

مهم اوووووووووي تهتمي بالتغذية من قبل الجواز...لانها بتنفع جدااااااااااااااااااااااااااااااا 

طيب جت اللحظة الحاسمة ونتيجة التحليل طلعت.....وطلعتي حامل ...ألف مبروك 
طبيعي في حاجات كتير هتتقرفي منها...وده عادي...هيبقي مودك متغير...بردو عادي 
بس حاولي كل شوية تخرجي نفسك من المود ده ومش تستسلمي له عشان نفسيتك 

ساعات كتير هتكوني حابة تروقي الشقة ومش هتبقي قادرة...وهتلاقي نفسيتك بتتعب 
ان الشقة مش متروقة...مش هقولك اضغطي علي نفسك...بس ع الاقل أول بأول ظبطي الدنيا 
لانها بتفرق جداااااااااااااااااااااااااااااااااااااااا ف النفسية 

شوية نصايح كده عشان موضوع الترويق ده : 
- لما تصحي رتبي السرير.
- أي حاجة تاخديها من مكانها ترجعيها تاني بعد الاستخدام.
- المواعين أول بأول تغسليها 
- الحمام طبعااااااااااااا كل يوم 5 دقايق قبل النوم بس تظبطيه .

اذا عملتي الحاجات دي ....هيتبقي ليكي حاجات تانية ممكن تقسميها ع الايام وتعملي كل يوم حاجة.

الترويق بيفرق جدا ف النفسية .


طيب بالنسبة للأكل...متضغطيش علي نفسك ...اول 3 شهور ممكن الاكل اللي مرتاحاله تمسكي فيه وتفضلي ماشية عليه 
بس طبعا يكون اكل مفيد...لحد ما معدتك تظبط

اول 3 شهور...الفوليد اسيد مهم جداااااااااااااااااااااااااااااااااااااااااااااااااااااااااااااااااااااااااااا 

اول 3 شهور مهم فيهم الراحة...متتعافيش علي نفسك ولا تستقوي عليها 
متضايقيش من انك حاسة بتعب...الاحساس ده هيروح بالتدريج 
حاولي اي حاجة بتبسطك اعمليها 


هاتي ورقة وقلم اكتبي 10 حاجات بتبسطوكي.....
وكل حاجة فيها طبقيها يوميا لمدة اسبوع

يعني مثلا لو بيبسطك انك تقرأي كتاب 
يبقي يوميا لمدة اسبوع تقرأي 

كده هتقعدي بتاع شهرين ونص بتعملي ف حاجات تبسطك 
وكده كده انتي بتعرفي انك حامل تقريبا ف اول او نص الشهر التاني ....

وان شاء الله ربنا يعدي الفترة دي معاكي علي خير
وتكوني فترة حلوة
وامسكي السبحة وافضلي استغفري طول الوقت بنية ان ربنا يهونها عليكي 
وهتلاقيها هانت والله بفضل الاستغفار....


الاكلات الممنوعة : المايونيز عشان فيه بيض ني 
والكيكة وانتي بتعمليها ماتدوقيهاش 
اللانشون 
البسطرمة 
السوسيس 
البرجر
اي لحوم مصنعة....

اللبن اللي بيجي من البلد بيبقي غير مبستر "ممنوع" 
القرفة 
الجنزبيل 
التمر 
اي حاجة فيها عجوة 
الحاجات اللي فيها مواد حافظة "يفضل تمنعيها تماما" 
الكافيين يفضل اول 3 شهور امنعيه "بس لو مش هتقدري يبقي يفضل كوباية واحدة ف اليوم بمعني كوباية شاي واحدة أو كوباية نسكافيه واحدة او "فنجان" قهوة واحد " وياريت تسألي الدكتور بتاعك عشان ممكن يكون ضغطك بيعلي 

"الحوادق زي المخلل" يفضل تمنعيه لان الضغط لما بيعلي في الحمل بيجيب مصيبة 
المياه الغازية والبيبسي ومشتقاته "ممنوع" 

وأشربي مية كتييييييييييييييييييييييييييييييييييييييييييييييييييييييييييييييييييييييير 
افضل حاجة بجد ف الحمل "اللبن الرايب" تحفة جداااااااااااااااااااااااااااا 

اهتمي اوي بأكلك...وكلي حاجات مفيدة
ياريت بلاش مقليات ونشويات عمال علي بطال 
والسكريات كمان 


حاولي تاكلي فاكهة وخضار ولبن وبروتين 

التغذية هتفرق معاكي جدااااااااااااااااااااااااااااااااااااااااااااااااا 


دمتي سالمة وربنا يهونها علي كل أم وكل حامل....




السبت، 3 يناير 2015

2015


سنة جديدة...والمفروض نتفائل والكلام ده .....


سنة جديدة....يعني تركز كده ....وتشوف أهدافك 
وتشوف نفسك تحقق اييييييييييه ؟؟؟

ماينفعش تبقي ماشي ف الحياة كده زي ما تجيبك وتحطك 

لازم يبقي في هدف....
كنت قريت في كتاب من فترة كده ....ان الاهداف مفروض تبقي علي جميع المستويات 
يعني أهداف علي مستوي الحياة المهنية مثلا ....والصحة....والعلاقات 
والإبداع زي انك تتعلم الموسيقي او تنمي هواياتك 
والعلاقات : زي انك تشوف ممكن تحط ازاي هدف يكون متضمن شريك حياتك 
أو اطفالك أو اسرتك ....

والموارد المالية : شئ مهم جدااااااااااا ان الواحد يعرف نفسه يبقي معاه كام 
وهيصرف كام وهيعمل ايه بيهم ؟؟

الرحلات أو بمعني آخرالإستجمام  : مهم بردو انك تبقي عارف نفسك تتفسح فين 
او ع الاقل يبقي هدف علي المستوي القريب 
كل فترة تاخد بريك كده وتخرج ف مكان ما ....تظبط خروجة مع ناس مشفتهمش من فترة وهكذا 

تطوير الذات : مهم انك تبقي عارف ازاي هتنمي نفسك وتحط خطوات لـــ ده 
يعني مثلا انك تعمل دبلومة ف حاجة معينة 
تاخد دورة تدريبة في حاجة بتحبها ونفسك تدرسها 
انك تقرأ عدد معين من الكتب 
انك تكمل دراسات عليا مثلا 


حاجات كتيييييييييييييييييييييييييير اوي بتبقي محتاجة مننا تفكير افضل من الفراغ اللي اوقات 
كتير بنوصله ...

اكيد بيبقي عندنا ولو ساعة ف اليوم فاضيين فيها 
لو كل يوم شغلنا الساعة دي بحاجة مفيدة تعزز الهدف بتاعنا 
هنخرج كل سنة بكم استفادة وكم رقي ...وتطوير رهيييييييييييييييب

أحلي حاجة ف الدنيا الارتقاء بالنفس 
واهم شئ ف الإرتقاء بالنفس...الإرتقاء بالعلاقة مع الله وعدم الإكتفاء 

احلي حاجة ف الدنيا انك تقرب من ربنا عشان يعينك علي دنياك :) 


دمتم في حالة قرب مع الله دوماً 
:) 

لو عجبك البوست ياريت تشيره ...:)