حكايات بنات ♥

 حكـــــــــــــــــــــــــــــــايــــــــــــــــــــــــــــــــــــــــــــــات بـــــــــــــــــــــــنـــــــــــــــــــــــــــــــــات 

اغلبنا اتفرج علي المسلسل ده ......في مننا اللي شافه مرة ومرتين ....المسلسل ده دخل جوايا ومزجني جدا 

لدرجة اني حبيت اتكلم عن تفاصيل المسلسل .....تفصيلة تفصيلة :) 

كاميليا : البنت الشيك الاستايل ...اللي بتحب كريم ...اللي مامته مسيطرة شوية علي تفكيره ...شوية كتير 

كاميليا : البنت اللي بتحب اصحابها واصحابها بيحبوها ...وجدعة معاهم ....ودايما كانت بتحب معاهم تتكلم في قلة الادب (حال بنات كتير مع اصحابها ) :D 

مريم : البنت اللي مبتعملش حاجة طول النهار غير انها ....بتاكل حاجات حلوة وبتتفرج علي التليفزيون وبتكلم خطيبها "هشام" ....واللي بتحبه ....ودايما بتعمل اللي بيقول عليه ...واللي هو عايش ف دور سي السيد ...بس بتحضر شوية 

فيها مننا ...بتفكرني ببنات اصحابي :)  

سلمي : عاوزة توصل للنجومية بأي شكل وبسرعة جدا ....البنت اللي اهلها سايبينها تعمل اللي هي عاوزاه ...ومش بيقولولها اي حاجة ....بيتها مفكك جدا ...كل حد فيه ف نحية....دخل حياتها رجالة كتير ....بس الراجل الوحيد اللي كان عاوزها بجد وعاوزها باحترام هو يوسف ...اللي كان بياخد باله منها ودايما معاها وبيساعدها وهي دايما مكنتش فاهمة حقيقة مشاعرها نحيته ....كانت بتلف تلف وترجعله تاني 

أحلام : البنت اللي اصحابها بيتلموا حواليها بيحكولها وبيشكوا معاها ....وبتحاول تخفف عنهم ....هي الحضن الحنين بتاع الشلة ...البنت الجدعة مع اصحابها وبتخاف عليهم ......"عاصم" دخل حياتها وعاش معاها كل تفاصيلها ....وسابها اعتقادا منه انه هيفشل ف الجواز زي ما اتجوز قبل كده وفشل .....كان ليها أم  ف المسلسل دايما نفسها تشوفها عروسة وف بيت جوزها 

المسلسل  بيمثل واقع بنات كتير مننا ....واقع امهات كتير ....واقع بيحصل حقيقي 

دايما في اصحابي او فيا ...هالاقي ...البنت اللي شبه احلام ...اللي بتخفف عن اصحابها بشكل ما ...اللي بتعيش تفاصيل الفرحة والحزن مع اصحابها ....اللي نفسها تفرح والدتها بس مش علي حساب نفسها ....اللي بتشتغل وناجحة ف شغلها ونفسها تحب ...وتتحب 

احلام مثلت حال كذا بنت مننا ....البنت اللي حبت واتحبت واللي الانسان اللي حبيته دخل جوة حياتها وتفاصيلها ....تقريبا مفيش حاجة ف حياته ....مكنش بيدخل فيها ...حتي لبسها كان بيشتريه معاها ....القهوة اللي كان بيخليها تبطلها ..."في مننا اتعلمت علي ايد الانسان اللي حبيته ...ازاي اصلا تتعود علي القهوة" .....الذكريات اللي كان بيعودها متبقاش هي اللي بتتحكم ف الانسان ولا ف حياتها 

وفجاة ....قالها انا اسف ...هسافر ...وانا بحبك ....وكان لازم تعرفي....الانسان ده جوة كل واحدة مننا بشكل ما ....بجبروته وانانيته ....بحبه لنفسه واحساسه ان في واحدة بتحبه ....وبتخاف عليه وبتستناه ....وبتعيش تقريبا عشانه ....بتفرح وتبقي الدنيا مش سيعاها لما يقولها كلمة حلوة....وتكتئب وتموووووووووووت الف مرة لما يهملها او مايفكرش فيها ...او او او ....وفجاة ....الانسان ده يسيبها لاي سبب من الاسباب ....ولانها مش هتقدر تكلمه او تقوله حاجة ......هو بيقول ليها كل اللي هو عاوزه ....وبيعيش معاها كل اللي هو حابب يعيشه ...وفجاة بيبعد....ويسيبلها مرمطة وجراح 

عجبني جداااااااااااااااا مشهد الوجع اللي بين أحلام وعاصم ف اخر المسلسل ...واللي انا شخصيا شوفته انه اتكتب باحترافية شديدة...وخصوصا  الــجزء الخاص بأحلام :

أحلام : مالك يا عاصم في ايه ....!!!! 

عاصم : انا مسافر يا أحلام .

أحلام : طب مانا عارفة انك مسافر ...مانت قولتلي في التليفون وبعدين ليه وشك عامل كده...انت هتروح ف حتة مش عاجباك !!!

عاصم : انا مسافر امريكا 

أحلام : وهي امريكا وحشة للدرجة دي يعني ؟؟؟

عاصم : طبعا انتي عارفة المشاكل اللي حاصلة ف وول استريت بقالها فترة ....

أحلام : آه ....هو ده اللي مضايقك !!!

عاصم : الشركة اللي انا بشتغل فيها حصلتلها خسارة كبيرة جدا في البورصة بتاعة نيويورك ....وطلبوا ان انا اروح اقعد هناك فترة.

أحلام : فترة يعني ....لحد الازمة ما تعدي وترجع مكتبك مصر تاني  ...مش كده !!!! 

عاصم : ع الاقل سنة...ويمكن أكتر ....محدش عارف الازمة دي موديانا لغاية فييييييييين ...

أحلام : وانت جايبني عشان تسلم عليا ....قبل ما تطلع المطار وتغيب  at least سنة ولا كده !!! 

عاصم : انا لسه هسافر دبي اسبوعين ....وبعدين ارجع القاهرة تاني وبعدين اسافر بقي من القاهرة لامريكا ...لسه بدري يعني ...

أحلام : طب تمام ...كويس انك مقولتليش ف اخر لحظة كالعادة 

عاصم : انا اول ما عرفت القرار جيت قلتلك .

أحلام : ميرسي يا عاصم ....بقولك ابقي كلمني لما ترجع عشان اقولك خلي بالك من نفسك ....وبتاخد شنطتها وهتقوم 

عاصم : ايه ده ايه ده انتي رايحة فين 

أحلام : مروحة 

عاصم : ايه شغل العيال ده ...احلام انا بكلمك 

الجزء اللي جاي ده بقي ....اكتر جزء عجبني ومزجني وحسيت ان كل حد مننا كان في حد ف حياته محتاجين نقوله كده بالحرف 

أحلام : ليه يا عاصم ....!!!

عاصم : ليه ايه ؟؟؟

أحلام : ليه ...ليه...ليه حسيت انك لازم تقولي بسرعة كده ...ليه حسيت  ان انا  لازم ابقي اول حد !!!!

عاصم : انتي مضايقة عشان انتي اول حد انا قولتله !!!! 

أحلام : آه ....ابقي لك ايييييييييه ؟؟؟ 

عاصم :  انتي بتسالي انتي تبقي لي ايه بعد كل ده ؟؟؟

أحلام : ابقي لك اييييييييييه...انا ف حياتك ايييييييييييييييييييه ؟؟؟ صاحبتك !!!! حد انت بترتاحله وبتحب تفضفض معاه ...ولا محطة في مصر في غيرها في انجلند ...في غيرها ف امريكا وف كل بلد انت بتروحه ...!!!!!

عاصم : مفيش حد  غيرك يا أحلام 

أحلام : غييييييييييييييري فيييييييييييييين ....غيري فييييييييييييييييين ؟؟؟؟ في قلبك ولا ف عقلك ...ولا ف دفتر تليفوناتك ....ولا ف الاسكاديوال البيزي اول بتاعك ؟؟؟

عاصم : في حياتي يا أحلام 

أحلام : ف حييييييييييييييياتك ؟؟؟؟ انا مش ف حياتك اصلا  يا عاصم ...انا مش ف حياتك ...أنـــــــــــــــا مش ف حياتك 

انت اللي ف حياتي.....انت اللي دخلت حياتي ....وشغلت الفراغ اللي انت محتاجه  بالظبط فيها ....خلاص ماتكدبش علي نفسك ولا تكدب عليا...مانت اللي دخلت حياتي وعملت كل "اللطف بتاعك والـتـشرم بتاعك" انت اللي اخترت تبقي موجود جمبي في موت امي ...انت اللي فصلت حياتي كلها علي مقاسك ....وطلبت مني اني احط كل الذكريات بتاعتي ف التلاجة ....وابدأ من جديد معاك ....انت اللي مسكت ايدي وحضنتني ....وعملت كل الحاجات العظيمة اللي كنت بتعملها  ....كنت بتعملها ليييييييييييه ...ليييييييييه وانت عارف انك هتمشي وتسيبني ف الاخر ....عارف انك مش هتفضل معايا اصلااااااااااااااااااااااااااااااااا 

ليه كنت بتعمل ده ...علقت دي ف رقبتي ليه "وقلعت السلسلة ورميتها ف الارض بعصبية" !!!!!! 

ف الوقت ده هو كان عمال يقول أحلام أحلام ...بزعيييييييييييييق شديد وكأنها ياعيني ضغطت علي اعصابه 

وهي مستمرة ...لييييييييييييييييه ...ليييييييييييييييييه...انا عايزة اعرف ...انا عايزة اعرف وافهم انا ابقي لك اييييييييه؟؟؟انا مين بالنسبالك..مين انا عشان ابقي اول حد خبر سفرك الجميل ده ...لاء ماتقوليش احلام 

انا عايزة اعرف يا عاصم .....عايزة افهم ومن غير اعذار 

عاصم : احلاااااااااااااااااام ...احلااااااااااااااااام ...انا بحبك يا أحلام ...انا بحبك 

احلام : بجد ؟؟

عاصم : احلام افهميني 

احلام : افهم ايييييييييه !!!! انك بتعترفلي بحبك ف نفس الوقت اللي انت اخدت القرار وهتمشي وتسيبني ...تتفهم ازاي دي ياعاصم ...

عاصم : ممكن تهدي طيب من فضلك 

احلام : سيب ايدي من فضلك ...من فضلك يا عاصم ...انا هادية خالص ...وخلاص اديني قاعدة ولو عندك اي حاجة تانية عاوز تقولها ...اتفضل 

عاصم : انا مقدر احساسك ومقدر ان الوقت مش مناسب ....بس انتي كان لازم تعرفي ان انا بحبك 

احلام : واكتشفت امتي الاكتشاف المزهل ده 

عاصم : من زمان 

احلام : زمان!!!! مقولتليش من ساعتها ليه 

عاصم : عشان الوقت مكنش مناسب 

احلام : ودلوقتي بقي مناسب 

عاصم : انا وانتي يا احلام بنفكر عكس بعض ....يعني انتي شايفة ان الحب اخره الجواز ...وانا شايف ان فكرة الجواز اساسا مش مناسبة بالنسبالي ....ماينفعش اتجوز   

(وهو عادي يعني انه عارف حاجة زي كده ...وعادي انه بيسحل بنات الناس معاه وهو عارف انه مش هيتجوز ف الاخر...حسبي الله ونعم الوكيل ) 

أحلام : ماينفعش حتي لو كان بين اتنين بيحبوا بعض ؟؟؟؟

عاصم : ده بالذات بين اتنين بيحبوا بعض ...

أحلام : ف ايه ؟؟؟ شوفت انت اننا خلاص نفضل كده ....ونقضي وقت لطيف مع بعض  وخلاص !!!!

عاصم : انا لا قولت كده ولا اقبل حد يقول عليكي كده اصلا 

احلام : وانت طبعا دلوقتي هتمشي وتسافر ....وعاادي تقدر انك تقولي انا بحبك يا أحلام ....عادي يعني ....اصل انا لا هينفع اقولك اتجوزني يا عاصم ....ولا هينفع اقولك لازم يبقي في  بيننا ....commitment يربطنا مع بعض ...ولا اي حاجة ....ف انت تقدر تقول اللي انت عاوزه عاااااادي 

عاصم : لأ ...مش كده ....

احلام : امال ايه 

عاصم : انا شايف ان من حقك انك تعرفي 

احلام : من حقي ....صح!! وانت من امتي كانت بتفرق معاك انا لازم اعرف ايه ومحتاجة ايه...من امتي !!!!....مانت بتعمل اي حاجة انت محتاجها وف الوقت اللي انت تحتاجه ...من غير مايفرق معاك اي حاجة ؟؟؟ 

مفيش داعي نبقي "سُخفة" ونكذب علي بعض يا عاصم 

عاصم : احلام ....انا ...انا كنت فاكرلما انا اتجوزت كنت بحب....بس انا اكتشفت ...اني لما حبيت بجد ماينفعش اتجوز ....:( 

احلام : انا اسفة ...انا بجد اسفة...انا اسفة علي كل الكلام  السخيف اللي انا قولته .....وميرسي علي كل حاجة انت عملتهالي بجد ....واسفة اني وجعتك ...معلش انت متزعلش مني...اصل انا كمان اتوجعت كتير ولسه هتوجع .....:( 

وقامت هتمشي....وقبل ما تمشي ....بخطوة واحدة ....قالتله انا كمان بحبك :( 

وانتهي .....خرجت من عنده ميتة ...منهارة ....روحها بتتسحب منها 

زي حال بنات كتير :( 

_______________________________________________

سلمي : اللي في حياتها يوسف ...اللي نفسه يسعدها بأي شكل ...اللي بيفكر يسعدها بطريقته ....محاولش يشوف هي ممكن تبقي معاه ازاي بطريقتها هي ....ازاي يعرف يدخلها صح ...محاولش ....:( عشان كده وصلها ...بس متأخر بعد ما كانت هتضيع ...وتضيع نفسها ....بعد ما ايام من حياتها اتسرقت ....وحاجات كتيييييييييير ضاعت 

_______________________________________________

كاميليا : اللي ضحت بشغلها عشان كريم ....وحاولت تبقي معاه بكل طاقتها وهو بكل بساطة استسلم لوالدته ....ومعرفش يدافع عن حبه ....كاميليا ....اللي حبت كريم بكل جزء فيها ....ولما ربنا مرزقهاش بأطفال ....هو معرفش يقف قصاد والدته ....ولا حتي عرف يقف قصاد رغبة كاميليا ....طلقها ....سابها تموت لوحدها ....سابها تتعذب لوحدها وراح هو اتجوز بنت خالته ....اه هيموت شوية ...بس لما هيموت هيلاقي حضن تاني يترمي فيه ....يخفف عليه وجعه .....بس كاميليا ....بس اتملت الدنيا حواليها احضان ...عمرها ما هتعرف تعوض حضن كريم ....اللي اتكسرت بسببه .

________________________________________________

كوكو : والدة أحلام ...اللي كان نفسها ومني عينها ...تشوف بنتها ف بيتها ومع جوزها .....ودايما بتكلمها ف الموضوع ده ....مشكلة اهلنا انهم بيفكروا بمنطق ....الولد متدين وابن ناس ومحترم ...وامكانياته مش وحشة ....ليه لأ...مش بيفكروا ف ابعاد تانية احنا بنفكر فيها ......بيفكروا كمان ف شكل اجتماعي قصاد الناس ...من وجهة نظرهم هما كده بيحافظوا علينا ....وعلي مستقبلنا .....بس للأسف بطريقتهم ....مفيش مرة ....بيفكروا ينصحونا ويسيبونا نعمل اللي احنا عاوزينه ...حتي لو مش نفس رأيهم ...وف الاخر احنا اللي بنتحمل النتايج ....مش عارفة ليه كده :( 

_________________________________________________

بشكل ما .....اجزاء كتير من المسلسل ده حصلت في حياة كل واحدة وواحد فينا ....المسلسل ده لمسني بشكل او بآخر ...علمني كتيييييييييييييييييييييييييييييييييييييييير جدا 

من اكتر المسلسلات اللي فعلا آثرت جوايا 

وهتفضل جوة كل واحدة فينا ...حكايات كتييييييييييييييييير من حكايات بنات :)